梁天琦－香港民族黨造勢大會 2016

圖片來自SocREC社會記錄協會 https://www.youtube.com/watch?v=VEUhAVki0DA

本篇文章取自梁天琦於2016年8月5日在香港民族黨造勢大會嘅發言。來自台灣的朋友可以看這篇 https://hknation.org/taiwan-edward-leung-hong-kong-independence-rally-2016/

咁多位香港人你哋好，我係本土民主前線嘅發言人，我叫做梁天琦。 好高興咁多位今日都會嚟出席呢個和理非非嘅集會啦，咁就可能好多人就會奇怪點解香港民族黨，或者本土派，會搞一個咁樣嘅集會？

教條主義

即使過往我哋成日強調話我哋要勇武抗爭，唾棄形式主義、失敗主義，咁係咪代表我哋一定唔可以嗌口號，唔可以搞遊行，唔可以搞集會，唔可以聽歌呢？其實一直都唔係。

我哋過往喺金鐘依個地方，喺旺角，當我哋喺雨傘革命走上前線嘅時候，點解我哋唾棄舊有嘅模式？點解我哋唾棄舊有嘅政客呢？就係因為佢哋教條主義，和平、理性、非暴力，有啲人仲覺得應該要非粗口添啦，佢哋覺得呢啲嘢係天條，一定唔可以違背。咁結果當喺金鐘依個地方，有義士衝出龍和道嘅時候，結果就畀一班教條主義嘅示威者拋棄。我哋反對嘅係依一樣，我哋反對嘅係教條主義，而唔係和平集會或者公民抗命本身嘅能力。

依一樣嘢我喺新東補選嘅時候已經講過一次，我哋依一個社會如果要攞返我哋應該有嘅權力，我哋唔可以再繼續教條主義。條條大路通羅馬，邊一個方式可以推翻依一個政府嘅，依一個方式就應該要去做，相信和平抗爭嘅人、相信公民抗命嘅人，繼續公民抗命，相信佔馬路，相信絕食，相信罷交稅等等，唔同和平手段嘅人繼續去做，我鼓勵你哋去做，我希望你哋去做！我唔希望你哋因為有人批評你哋嘅手段，結果就完全放棄你哋相信嘅嘢。同時間相信勇武抗爭嘅人，一樣都要繼續做。

近呢幾個月，我哋曾經發起過示威，就係七一嘅一個示威喺中聯辦外面，我哋失敗咗。我哋連累到有好幾位義士出到嚟，諗住支持我哋但結果被捕，乜嘢都做唔到。 Plan A 做唔成、 Plan B 做唔成、Plan C都做唔成，證明咗啲乜嘢嘢？我哋反抗政府，攞返我哋應有嘅權力嘅時候，我哋要因時制宜。當晚有近千個警察守喺西環，如果我哋盲目相信勇武抗爭係一定會成功、只有勇武抗爭先係一定要行嘅路嘅話，我哋當晚就會一齊去送死。我唔想見到有人犧牲，亦都唔想見到有人係被推上前線。只係喺一個必須嘅情況底下，只係喺一個兩難嘅局面，一係就留低，一係就企喺度抵抗嘅時候，我哋先至要孤注一擲，勇武抗爭。

我希望大家會明白依一點，唔好再繼續教條主義，唔好再盲目相信自己嘅嗰一條道路，係一定會成功，係必須要行嘅道路，而其他嘅所有道路都係唔應該行，係錯嘅。我哋絕對要因時制宜，所以我覺得今日民族黨搞呢個集會，其實係非常之好嘅一件事，因為我相信，呢四隻字（香港獨立）我唔講得吖而家，因為要打官司要選舉呈程吖，咁所以就唔講得啊，好嘅辛苦，真係好辛苦。呢四隻字呢（香港獨立），呢四隻字係第一次喺天馬公園依一度出現，然後有咁多香港人走出嚟，就係為咗呢四隻大字。呢一個係一個歷史性嘅時刻，所以我唔會叫你畀啲掌聲自己嘅、絕對唔會，但係要記住依一刻，呢一刻係我哋彰顯我哋獨立意志嘅一刻。

好，跟住就入正題，咁今日呢，咁其實我思緒就好混亂嘅依段時間，因為發生得太多事喇呢兩個禮拜，即其實我乜嘢選舉我根本都未開始準備，我仲返緊學，咁結果呢，呢啲政治嘅旋渦、政治嘅風波就係咁冚埋嚟要不斷去面對，所以到而家嘅依一刻呢，我個頭腦嘅非常之混亂。到底要講啲乜嘢嘢，先至最能夠鼓動大家獨立嘅意志，到底要講啲乜嘢嘢，先至最能夠令到更加多人醒覺走出嚟反抗，都仲未諗好。

政治

咁但係有幾個主題我係想講嘅，咁就寫咗係手板，第一樣嘢呢係政治，乜嘢係政治呢？有人話係眾人之事，而我睇政治嘅本質，其實就係權力嘅分配。當我哋講一個政治問題出現嘅時候，其實就係講緊呢個社會上嘅權力資源，到底係畀中央繼續集權吖、或者係畀社會上嘅權貴繼續保持佢哋嘅權力，亦話呢啲權力會轉移去另一個持份者，例如人民、例如香港人。

咁依兩個禮拜發生嘅事係啲乜嘢嘢呢？就係政府將佢哋本身法例上冇嘅權力延伸、無限延伸，白紙黑字寫明嘅法律，政府唔跟。政府延伸佢嘅權力、剝奪人民本身應該有嘅選舉權、被選舉權，以及言論自由。所以依個係一個權力分配嘅問題。當我哋班香港人走出嚟反抗、追求一個政體嘅改革，或者好似今時今日咁樣、追求呢四隻大字。我哋講緊嘅就係我哋要奪權，我哋要攞返一個社會上，我哋應有嘅權利，依一個社會，依一個香港嘅主權，唔係屬於習近平，唔係屬於中央，唔係屬於共產黨，唔係屬於中國政府，亦都唔係屬於特區政府，依一個社會嘅主權係屬於香港人，主權永遠都應該在民，唔應該在於北京，但係香港嘅情況係點樣？

香港有百多萬嘅香港人，有血有肉嘅香港人，一百幾十萬，佢哋冇選出一個代表佢哋代議士嘅權力，佢哋冇被選舉權，佢哋冇言論自由，佢哋嘅權利，完全畀政府剝削，依一個係乜嘢社會啊？依個係一個獨裁嘅社會，有獨立意志嘅人，追求意志嘅人面對一個獨裁政府應該點樣？革命，但係問題就嚟喇，革命會流血㗎喎，革命會失敗㗎喎，革命會有犧牲嘅喎，當然會出現啦。如果呢個政府唔令你嘅革命失敗，唔打壓你嘅革命，唔令到你有犧牲，唔剝削你嘅權力，唔呃殺你哋喺萌芽之中，代表啲乜嘢？代表你哋嘅革命冇效囉，代表你對政府冇威脅囉！咁所以今時今日依一個局面，好似好差，但同時間亦都反證一樣嘢，就係我哋對香港政府，以及北京政府、中國，我哋對佢哋構成威脅，所以大家係應該為依件事出現，而鼓舞。

我哋丟掉咗對香港政府、對特區政府、以及對基本法對一國兩制嘅幻想，我哋今時今日，依一刻開始，我哋準備鬥爭、我哋準備奪權，依一個就係今日依個集會嘅意義。

勇武抗爭、政府

跟住另一樣嘢：政府，乜嘢係政府？政府點解會出現？政府係因為人民希望有一個權力分配嘅機構去維持社會嘅秩序，先至會出現。政府唔係一個管治人民嘅機構政府，應該係人民嘅僕人。人民唔應該害怕政府，政府應該害怕人民。相信大家有睇戲嘅應該知道，呢兩句說話係香港一樣適用。雖然今時今刻，仍然有好多香港人係害怕呢個政府，點解？政府武器，政府有武力，政府有權力，政府掌握晒社會上嘅話語權。政府有法律，佢可以隨意解釋法律，袁國強講嘅法律就係法律，依個就係香港。政府嘅本質就係一個暴力嘅機構，當我哋做嘅事，唔符合政府所諗，唔符合政府當權者嘅方向，佢就會用暴力嚟打壓我哋！

所以點解我哋要強調勇武抗爭？就係因為政府本身已經係一個暴力嘅機構，對住一個暴力嘅機構，我哋唔可以仁慈，唔可以懦弱，亦都唔可以再同佢講乜嘢人義道德。依個政府根本就係一個誣賴嘅政府，中國就係一個誣賴嘅政府，你同佢講仁義道德做乜鬼嘢呀，佢要做誣賴嘅，當然有好多人唔想做誣賴喇、包括我自己。但係如果呢個係一個必要嘅方法去推翻個政府嘅話，我願意做呢個誣賴。

革命

跟住落嚟第三樣：革命。乜嘢係革命？大家一定會即刻聯想到流血革命，辛亥革命，死人，冧樓，犧牲，打壓，監獄，大家一定會聯想起依一切一切，但其實革命本身係一樣乜嘢事呢？革命本身就係講緊一個社會結構、權力分配，一個根本性嘅改變，一個從下而上嘅改變。一個從上而下嘅改變，其實係代表一個改革，而一個從下而上嘅改變就係革命。

咁大家諗下今時今日，你哋仲會唔會奢求中國香港特區政府從上而下改革？仲會唔會相信佢哋會畀我哋有民主，畀我哋有自由？冇可能，所以話，我哋必須要革命。而革命，幾時開始？革命其實已經開始，兩年前點解我哋班本土派叫雨傘運動叫做雨傘革命，就係因為我哋知道嗰一刻，就係一個開始。嗰一刻更加多香港人知道我哋唔可以再靠其他人，我唔可以再靠呢個政府網開一面，因為如果你依靠佢網開一面，先至畀我哋有民主嘅話，依一種只不過係一種人治。

點解我哋要當權者網開一面啊？點解我哋要北京政府有一絲善念，知道香港人其實唔係諗住顛覆國家㗎，只不過想要權力咋嘛，只不過想要民主咋嘛，而開啟個民主嘅改革啊？我哋就係唔相信依樣嘢，九二六、九二八、一一三零，我哋先至會走出嚟，從下而上向政府施壓。我哋唔希望香港係一個人治嘅社會，我哋希望香港係一個法治嘅社會。憲法寫到明我哋應有嘅權利，我哋就應該要有，所以兩年前，依一個革命已經開始咗。只不過大家唔知道，只不過大家仍然覺得唔係吖，好和平，好理性，好非暴力，非常之美好嘅一個烏托邦，好似金鐘嘅嗰一條馬路，夏愨道咁樣，但其實革命已經悄悄開始咗。

因為我哋唔再奢求當權者從上而下改革，我哋係由下而上扭轉依個社會嘅權力結構，革命已經開始。 咁到底幾時會成功？ 一八九四年，孫中山係做緊啲乜嘢嘢呢？佢仲喺度向李雄璋上一本書叫做萬言書，仲講緊一個滿清政府應該點樣改革，咁相信大家都知道佢喺一八九五年，冇人理佢之後，成立咗興中會，開始正式嘅革命。幾時先成功？一九一一年由佢開始走上革命嘅依條路，用咗十六年先至推翻到一個滿清政府。我唔想掃大家興，唔想潑大家冷水，但係革命係一條長嘅路，冇可能一時三刻就成功，但係又有可能突然之間一時三刻就會成功，係一樣好吊詭，好好笑嘅一件事－革命。

但係我哋要保持依一個革命嘅精神，我哋要影響更加多嘅人，因為當成功嘅嗰一刻，我哋回望返過去，我哋就知道一切都係值得。如果革命成功之後，我哋攞唔到人民嘅心，民心，我哋冇辦法得依個天下。得民心者得天下，所以我哋最先要做嘅嘢係影響更加多嘅人。今時今日有十七個百分比，百多萬嘅香港人相信依四隻大字，我哋要繼續將呢個數字繼續上升。我唔知道幾時我哋先至會成為社會上嘅大多數，但我知到終有一日我哋係社會上嘅主流，依樣係必然會發生嘅事。

因為即使今時今日我冇得參選，即使今時今日我冇得再從政，我相信依個「門常開」一日喺依度，我都冇機會走入去隔離嘅依一棟大樓。但唔緊要，因為仍然有第二個人取代我，後繼絕對一定會有人。你哋絕對唔應該將所有嘅希望擺喺一個人嘅身上，一個人佢代表嘅當然係代表佢自己囉，但同時間佢代表嘅只不過係一個理念，你哋追隨嘅應該係一個理念，而唔係一個人。即使我冇辦法參選冇辦法再－我唔知仲可以做啲乜嘢嘢到今時今刻，但係我知道我仍然可以繼續影響更加多嘅人，我仍然可以繼續宣揚我嘅理念，我哋要繼續影響依個民心，我哋終有一日會成為主流，終有一日會成功。

夢想

到最後，夢想，乜嘢係夢想呢？夢想係，夢想就係夢想囉，咁夢想其實係好虛幻嘅一件事。夢想喺實現之前，永遠都係好似癡人說夢話咁樣，我喺十八歲嘅時候就係－呢個十七、十七歲嘅時候，就係二零零八年，咁有好多記者喺度啦，咁我唔講啲乜嘢政黨、或者議員嘅名。但係當時零八年大家都知道有邊一個新嘅政團走入去立法會，大家都應該知道當時有邊一個領頭人物，係一個政黨嘅代表，佢哋喺議會入面做嘅所有嘢，影響到我。我中六嘅時候就同我嘅一個同學講，我將來想成為一個代議士，你覺得點睇？佢就話幾好吖，你都幾啱做吖，你一定會成功嘅，我將來會投票畀你！咁但係依一樣嘢，今時今日好似失敗咗，但係曾經我距離依一個夢想，只有一步之遙，而喺我追求一個夢想嘅依半年發生咗啲乜嘢事呢，依一年。

其實一年前我只不過係一個廢青，一年前我只不過係一個畢業唔到嘅大學生。好想畢業，畢業唔到。一年前我只不過係一個社會上完全冇人知我係乜嘢人，我亦都唔知道我喺社會上應該擔當乜嘢角色，嘅一個廢青。有邊一個人會諗到，一年之後依一個廢青，會成為一個被政府剝削政治權利嘅香港人。有邊一個人會諗到，一年之後依一個廢青，係曾經距離依一個夢想只有一步之遙。冇人會諗到，我自已都唔係真係好相信。但係即使我自己對我嘅夢想能唔能夠實現，只不過係半信半疑，但係我知道如果我真係繼續半信半疑而唔去做嘅話，我一定會失敗。

如果我係秉持住呢一個夢想即使知道好難成功，即使知道好大機會會失敗，即使知道我走出嚟會畀人恥笑，會畀人唾氣，會畀人謾罵，會畀人打壓，但我都依然繼續去做，人冇夢想同鹹魚有咩分別呢係咪？咁所以我繼續去做，咁所以一年之後，你今時今日你見到我梁天琦企咗喺依度，但係其實一年之前我只不過係一個廢青，揾唔到工，乜嘢都做唔到，乜嘢都唔識。所以今時今日大家有呢一個理想，有呢個夢想，大家要繼續保持依個夢想。

終有一日我哋會成功，因為今時今刻好多人會恥笑我哋，覺得我哋係黐線，但係一年前又有邊一個人會諗到，呢四隻大字會影響到咁多香港人，會走嚟呢個地方集會啊？一年前你講呢四隻大字會畀人以為、會畀人話，黐線嘅，打機可能得啊，唔好發夢啦，但一年之後有依個集會出現，咁再一年之後會有啲乜嘢事出現啊？我唔知，但如果我哋呢一班人，以及社會上有好多未來嘅人繼續保持一個夢想嘅話，我哋一定會實現呢個夢想，一定會成功。喺依一刻，非常之黑暗，陳浩天所講。咁但係我相信大家，有好多人都有睇過蝙蝠俠，咁蝙蝠俠入面有一個對白，就係話黎明之前嘅黑暗係至撚黑暗嘅，真係好黑暗，但係黎明即將會來臨，多謝大家。光復香港！時代革命！